中環出更：李澤鉅偕舅父行善助貧童
長實集團主席李嘉誠嘅家族做善事一向不落人後，李嘉誠嘅長子、長實副主席李澤鉅尋日現身舅父莊學熹做主席嘅「幼吾幼慈善基金」一個活動，原來李嘉誠基金會係幼吾幼嘅其中一個成員機構，李澤鉅身為基金會董事，梗要親自撐場打氣。佢另一位舅父莊學山都喺度，三位城中名人齊心做善事，零舍溫馨。
莊學山兄弟拍住上
莊學山、莊學熹兩兄弟係城中知名慈善家，兩人拍住做好多慈善工作，例如開設高檔社企港產時裝品牌「L+H」。佢哋去年又默默成立咗幼吾幼慈善基金，去年二月基金推出第一個項目「333小老師培訓計劃」，喺北區及觀塘設立兩個中心，為低收入家庭學業欠佳嘅小學生補習，並提供德育課程，已有四百名兒童受惠。由於試驗成效良好，吸引咗同為兒童謀福利嘅UBS Optimus Foundation注意，終促成兩機構尋日攜手合作正式啟動「333小老師培訓計劃」。
李澤鉅同UBSOF董事會成員施許怡敏尋日一齊做主禮嘉賓，莊學熹話，計劃取意於古訓「三人行必有我師」，佢相信自細打好小朋友嘅學業及道德基礎，對於下一代未來嘅發展好重要。基金已承諾撥款一千三百五十萬元，於未來三年支持333計劃嘅發展，預計第四季喺深水埗開設嘅第三間中心可以啟用。
卓妮