政情:立會新大樓無啖好食

新立法會大樓嘅飯堂招標一波三折,繼無人問津後,立法會早前更加降低入標條件「吸客」,但結果只係得一間飲食集團入標。由立法會議員、職員同埋傳媒代表所組成嘅「七人試食兵團」尋日去試食,全部都食到「嘴藐藐」,食物質素被評級「肥佬」。立法會行政管理委員會今日要開會,急謀對策,其中一個方案係以「免租」吸引食肆再入標。

據參與試食嘅議員講,佢哋由早餐試食到午飯同晚飯套餐,但幾乎全部食物都「慘不忍試」。有議員稱,乾炒牛肉嘅牛肉極之難食:「牛肉極腍,其實係醃過龍。」當試食咖喱牛腩時,有成員慘叫:「點解啲咖喱係甜嘅?」早餐蘿蔔糕更令大家失望:「無口感,無蘿蔔味!」最基本嘅奶茶亦好唔掂。

結果,食物質素廿分為滿分,七人中,三個委員畀咗兩分,最高一個都係畀六分。新大樓十月入伙,有議員保證,屆時一定唔會食到咁難食嘅食物。睇吓點。

Money18免費即秒股票報價網站現推出8升級功能,財經資訊,實時實發!