政情：莎姐出山撼田二少？
上屆立法會直選全軍盡墨嘅自由黨，下屆點翻身係焦點之一。奈何自由黨苦無大將，可以喺直選擔大旗出選，數嚟數去都係數番榮譽主席田北俊、副主席莎姐周梁淑怡呢啲靈魂人物。田少喺新界東捲土重來嘅機會好大，但莎姐會唔會喺新界西「再來一次」？
其實莎姐退下火線之後優哉游哉，老公周明權有一次陪佢出席活動時講到明，話太太唔再選㗎喇，而莎姐早排喺電台節目表明，自由黨唔會去新界西同退黨嘅田北辰對撼，出山機會幾乎微乎其微。但近排自由黨內部有人提出，既然田北辰已經入咗新民黨，自由黨無理由要讓路畀新民黨，加上該黨民調顯示，莎姐支持度仍然唔錯，仍有機會當選，問題係莎姐肯唔肯出山。
立法會選舉始終都係明年嘅事，至於迫在眉睫嘅十一月區議會選舉，自由黨就會派廿多人參選，希望重建地方實力，區議會選舉成績好，打穩樁腳，參加直選就可以輕鬆啲嘞。