政情：王國興拆僭快人一步
工聯會立法會議員王國興月前被揭發位於屯門屋企有「搭建物」，興哥三扒兩撥搵屋宇署註冊承辦商拆嘢，花六日時間成功「拆彈」。相比之下，五月尾被揭發層樓有僭建物嘅煲呔曾，卻連棚架都未搭，一於話之你。
興哥尋日宣布，上周六已拆除家中露台平台晾衫用帳篷及小型玻璃結構嘅工程，花費四萬元。大拿拿唔見幾萬銀，興哥都話肉赤，但事件困擾多時，唔拆唔安樂，所以風波曝光翌日，佢拿拿臨按照屋宇署列出嘅註冊承辦商名單，逐間打電話格價，最後扑錘喺二十日動工，工程六日搞掂，都算快手。
煲呔曾歎慢板
相比之下，煲呔曾就大歎慢板，五月三十一日被《東方日報》同《太陽報》揭發佢麥當勞道碧雲樓間屋企有僭建物，佢死撐後決定清拆，但係事隔成個月，個圍封咗玻璃嘅露台仍然原封不動。對於煲呔曾做嘢手腳慢，王國興話做好自己嘢，唔想評論人哋喎。行政長官辦公室發言人解釋，已向有關當局入則，等緊審批。
