政情：棠哥7‧1前發炮贈「興」
民陣首次以「曾蔭權下台」作為七‧一遊行嘅主題之一，泛民主派自然磨拳擦掌，準備同煲呔曾「玩鋪勁」，理應明撐夕陽政府嘅建制派中人亦對政府愈睇愈唔順眼，其中曾因最低工資立法同煲呔曾撐到行嘅工聯會，更由身兼行政會議成員嘅會長鄭耀棠領銜主演，公開喺七‧一前夕落煲呔曾面，宣布該會在房屋問題上支持「增建公屋，復建居屋」。面對呢個眾叛親離嘅場面，如果我係煲呔曾，七‧一當日就無面出嚟見人喇，費事畀人鬧到面懵懵。
自○三年七‧一有五十萬人上街，推翻《基本法》二十三條惡法，最後更令「老懵董」腳痛下台後，七‧一前後已成為政壇嘅寒暑表，泛民主派固然每年都喺七‧一遊行中大力鞭撻政府嘅拙劣施政，建制派亦不時睇準時間插政府一刀，就好似以尋日早上為例，喺立法會討論派六千元安排時，建制派批評政府嘅力度絕對同泛民主派有得揮，其中工記黃國健更率先向政府示警，「大熱天時如果暈了幾個長者入醫院，相信政府一定係千夫所指。」
工記一係唔發炮一係就猛烈開火。話說棠哥下午舉行記者會，本來只係公布慶祝香港回歸十四周年活動疑似「大縮水」，由過往嘅大型巡遊改為舉行嘉年華會活動，但殊不知棠哥講講吓，就自行騎劫咗是次記者會嘅主題，突然喺記者會後口風一轉向夕陽政府嘅房屋問題「發炮」，並即席預告工記嘅房屋研究報告即將出爐。
美孚新邨都有「劏房」
棠哥放風話，工記已研究咗房屋政策成半年，力主政府要「增建公屋兩年上樓，復建居屋安居樂業」，而且佢哋喺研究時仲發現「劏房」盛行，連美孚新邨都出現「劏房」咁話。明眼人都睇得出政治老手棠哥係有備而來，否則都冇可能講得咁深入，話棠哥唔係積積埋埋搵機會鞭撻政府一鑊都無人信喇。
既然棠哥都做好準備披甲上陣同政府唱反調，工記其他兄弟亦即時全民皆兵做嘢。棠哥話，其實工記議員最近兩個月同煲呔曾「
哦哦」嘅都係房屋問題，而且佢亦都指示工記議員要盡快向立法會抽籤作動議辯論討論房屋問題。如果呢個民望每況愈下嘅夕陽政府仲係借咗聾耳陳隻耳咩都聽唔到，到時建制派真係群起搞革命，都只可以話係自己攞嚟衰，與人無尤喇！