新民黨主席葉劉淑儀同兩位副主席田北辰及史泰祖尋日開記者會，話現時政府架構，係上世紀七十年代嘅古董，不合時宜，有需要重組。佢哋建議增設兩個屬首長級第九級嘅局長，由人力發展局局長統籌教育局同勞工福利、經濟發展局局長統籌商務及經濟局、創新及科技局，另外要設立四個委員會，喺幾個重要範疇，提出長遠規劃。
一個政府，要兼顧嘅嘢咁多，職責搓圓撳扁都唔會消失咗，分工太仔細，好容易變得疊床架屋。今次葉劉將政務司司長同財爺兩個位「削權」，難免惹來猜測，甚至呢個唔通係葉劉未來一旦執政嘅未來政府架構圖？葉劉話，呢次建議不涉個人因素，係咪要問鼎特首亦係「言之尚早」。