政情：王少強造制服嗌肉赤
尋日係梅窩鄉事委員會嘅就職典禮，唔少嘉賓都好畀面，送花牌祝賀唔在講，仲山長水遠咁去到梅窩撐場，包括新界鄉議局主席兼行政會議成員劉皇發、新界鄉議局副主席張學明同林偉強等。不過梅窩鄉委會嘅成員亦無欺場，鄉委會特登準備兩套制服，正、副主席着住嚟招呼嘉賓嘅改良中山裝制服仲值成五千蚊架，認真重視個就職典禮同嘉賓。
梅窩鄉委會尋日喺梅窩康樂中心舉行就職典禮，主席王少強、第一副主席鄒長福同第二副主席黃文漢着住同一款嘅改良中山裝，咪以為係「撞衫」，其實係制服嚟嘅。王少強話，呢套制服淨係得正、副主席先有，係專登搵設計師設計，成五千蚊一套，仲要係自己掏荷包畀錢。大拿拿用五千蚊度身訂造套制服，王少強都忍唔住話「好肉赤」，不過為咗隆重其事，佢話係「願打願捱」喎。
政府六千蚊未派到手，五千蚊訂造制服唔係個個都捨得，所以其他執行委員同埋各個村代表就只係着藍色反領T恤啫。