政情：張炳良冧莊掌消委會
政府尋日宣布再度委任行政會議成員張炳良做消費者委員會主席，任期兩年，到二○一三年七月十二日為止。佢早喺○二年一月一日已出任消委會委員，即係前後會做足十一年零七個月零十二日。
政府委任法定及諮詢機構成員有所謂嘅「六六規定」，即係同一個人唔可以同時兼任六項公職、每項公職最多連續做六年，但如果某人任職同一個機構，但中途由普通委員轉做副主席或主席，甚至由主席轉做副主席、正副主席轉做普通委員等，任期年限就可以重新計過。因此喺○七年七月起由消委會委員轉任主席嘅張炳良，並無違反有關規定。
張炳良喺○二年初獲委任時，仲係民主黨成員，但自立門戶成立「新力量網絡」，佢其後喺○四年正式退出民主黨，脫離反對派行列，○七年仲做埋行會成員添，之後隨即獲升任為消委會主席。