政情：蔣麗芸憶姊弟妹往事
前總商會主席蔣麗莉被裁定串謀詐騙入獄後，蔣家上下都大感心痛。蔣家二家姐、全國政協委員蔣麗芸（Ann）日前接受有線電視訪問時，就憶起與麗莉等一眾姊弟妹嘅童年開心往事，佢話爸爸蔣震每逢周日都會帶佢哋去放風箏同游水，感覺窩心兼回味無窮。不過，當阿Ann談及去世嘅母親時，就忍唔住落淚，遺憾未能讓母親享福。
當日阿Ann帶咗主持人陳啟泰回到少女時代成長地美孚新邨，佢憶述：「童年時家境唔係太好，一餐飯只得一碟餸，但我哋仍食得好滋味。」佢又話：「爸爸平日工作好忙，但星期日總會帶一家人去玩，常常畀我哋驚喜，好似去放風箏、游水咁，我哋幾姊妹就開心到一起歡呼！」不過，阿Ann就自責細個好反叛，試過夜晚偷出街去參加派對，覺得要爸爸擔心好唔應該喎。
阿Ann仲記得喺加拿大讀大學時，母親病重過身，對佢哋幾姊弟妹造成好大打擊，佢講講吓仲泣不成聲，話媽媽一直為家庭付出，辛苦咗大半生，好遺憾未能讓媽媽享福，所以佢哋幾姊弟妹都遵照媽媽嘅遺願，熱心服務社會。