政情：王桂壎拒認新公職王
政府經常委任自己友加入諮詢委員會，因而被指「親疏有別」。剛卸任律師會會長嘅王桂壎（阿壎），最近接二連三獲委任多項公職，包括機場管理局成員、司法人員推薦委員會委員等，一代新公職王從此誕生。不過，阿壎尋日出席青協同律師會合辦嘅活動時，一聽到新公職王稱號即時耍手擰頭，強調自己只有幾項公職，排隊都未輪到佢喎！
推波畀黃嘉純
阿壎為清除公職王標籤，反指同樣係律師會前會長嘅黃嘉純有嘅公職數目仲多過佢，估唔到佢講到呢個話題會咁緊張。講開未來兩年多場選舉時，阿壎更加主動爆料，話決定咗唔會參選年底舉行嘅選舉委員會法律界選委選舉。
阿壎解釋，依家距離選委選舉只剩下好短時間，而且佢又有兩個新公職喺身，所以喺權衡輕重之下決定唔考慮參選喇！
如果大家記得，律師會喺○六年底派出十二人名單參選法律界選委，但最終不敵泛民主派二十人名單而全軍覆沒，唔知阿壎係咪見過鬼怕黑，所以拒絕再玩呢？