政情：立會煞科 好戲連場
立法會如無意外會喺今個暑假搬往添馬艦新大樓，意味下月十三日召開嘅立法會大會，將會係舊大樓最後一次舉行大會。政府同各黨派議員都準備臨別秋波玩鋪勁，將各式各樣嘅議題排晒喺呢次告別大會表決，保守估計最少要玩足三至五日，甚至有機會成為香港政治史上最長命嘅大會，連正式嘅惜別舊大樓活動都可能被迫押後，為舊大樓過百年歷史上再添一筆！
過往每個立法年度嘅最後一次大會，通常都會積咗大量法案及議題，以趕及喺暑假休會前表決。今年嘅煞料大會亦唔例外，當中最具爭議性、估計要花最長時間辯論嘅，要首推外號防「公投」機制嘅替補機制法案，冇事冇幹都可能要連傾兩日。如果人民力量議員陳偉業最後真係大玩拉布，就法案提出過千項修訂，隨時傾多四、五日都搞唔掂！
除咗替補機制，暫時已排咗喺大會辯論嘅，仲有政府帳目委員會嘅東亞運大花筒醜聞報告、議員個人利益監察委員會就多名議員漏報高鐵利益嘅報告及訓誡專業會議議員石禮謙嘅動議，再加慣常嘅六條口頭質詢及兩項議員議案，任何一單嘢都可能要傾兩、三個鐘。另外仲有未正式排隊、但相信亦會趕喺十三日辯論嘅甘乃威怒炒女助理調查報告及特權法查葛輝事件議案，建制派同泛民主派又會拗餐飽。
料最少傾三日
有份編排大會議程嘅內務委員會主席劉健儀就估計，呢次告別大會最少要傾三日，由十三日星期三傾到十五日星期五，原定喺周五舉行嘅特首答問大會亦九成九要推遲，甚至連星期六及日、十八日周一舉行嘅官方惜別舊大樓活動、以及十九日周二成行嘅港區人大黑龍江考察團，都可能受到影響。公民起動議員何秀蘭更自爆，佢同一批草根派泛民議員同民間團體，亦原定喺周六及日開會籌組工黨，依家都可能被迫押後。
建制派同泛民議員喺會議上口水四濺，但就苦了一批酷愛粵曲嘅長者，事關播開粵曲嘅香港電台第五台，又會被迫馬拉松式直播立法會會議，令長者一連幾日都冇得聽粵曲，認真無辜。