煲呔曾大抵真係英文叻過中文，是以在香港一見傳媒，通常口窒面黑，可是人一離岸，好似早前出訪澳洲，對着洋記者，就成隻開籠雀咁，生命燦爛，人生美好，吱吱喳喳談「房事」，在民望低處未算低時忽然驚覺：香港啲樓價升到「好得人驚」，再唔發一發聲，住屋問題真係會變成政治問題，屆時吹口哨再不能輕快愉悅。臨收工還要唱「我是一隻小小小鳥」，認真冇癮也！
煲呔曾在香港吹水太多，作為「政治家」，好多嘢講咗又唔兌現，冇口齒，你叫市民大眾點信佢？香港市民對佢信心已死，不信任度持續增加，其實係多年來積聚的「果」，如今，理應他及其管治班子承受。
話說煲呔曾在澳洲出洋相外，接受彭博通訊社記者專訪時，冷不防對方翻舊帳。事關佢○七年競選連任特首時，曾誓神劈願承諾將利得稅由現時嘅百分之十六點五，減至百分之十五，可惜佢下巴輕輕「說了算」，呢張空頭支票睇怕到佢收工也「無緣」兌現，商界只能望着夕陽馱着他長長的背影大嘆無奈！大抵浮生若夢，「政治家」的話就當撞聾！
煲呔曾當年與年輕人對談，承認自己讀書時至憎歷史，作為「政治家」卻不愛歷史，老朽相信打鑼都難搵第二個。當然，唔識歷史就不能「以史為鑑」，錯——係應分嘅！「民主」與「民革」一字之差；「信心」與「冇心」亦一字之別。少年毛澤東十九歲寫出憂國憂民的《商鞅徙木立信論》，煲呔曾不識史，不懂「敬事而信」，無心也可原諒！