卸膊「棺材房」問題
不過，負責嘅民政事務局局長曾德成就勁卸膊，話當局早前曾經先後三次進行巡查，其中一次成功進入處所，但多數房間已上鎖，所以睇唔到啲床位數目，唔能夠證明有關處所要法例領牌經營喎。
原來睇唔到就可以當無事發生，德成局長確係將「眼唔見為乾淨」呢句說話演繹得淋漓盡致，有啲咁嘅高官治港，唔怪得呢個夕陽政府江河日下喇。
講開「棺材房」，專業會議議員梁美芬就話，佢曾經因搬屋暫住酒店，當時住百零呎全海景房間都只係一萬元，質疑係咪有人無知畀人呃喎。其實以租金相比，梁美芬講得無錯，但佢用酒店海景房同「棺材房」相比就確係有啲極端囉！