政情：梁廣灝望加快復建居屋
近日股市好似食咗瀉藥咁，但樓價依然高企，唔係人人買得起，對於兩頭唔到岸嘅中產人士體會最深，所以社會要求復建居屋嘅聲音未停過。曾任香港工程師學會會長嘅新昌營造董事總經理嘅梁廣灝，都話好贊成復建居屋，但佢就睇死要拖到下屆政府先至真正落實。
擔心拖到下屆政府先搞掂
梁廣灝日前出席一個活動時話，對於中產階層置業困難，佢都好有同感，所以都希望政府復建居屋，幫助呢班夾心階層。不過，佢就坦言政府依家做嘢比較「立」咗啲，搵得土地嚟，又要做環境評估，搞搞吓，睇怕都要靠下屆政府先至可以做到囉。
其實本港樓價年前已不斷上升，但當時煲呔話「豪宅與普通住宅係兩個市場，豪宅樓價飆升不會影響民生。」直到依家有無影響相信大家有目共睹，煲呔曾依家先至放風話復建居屋，等得佢喺十月施政報告拍板，起得嚟真係蚊都瞓，分分鐘畀梁廣灝講中，要拖到下屆政府先至做到。