近年跨境學童數字年年攀升，但港府仲減發便利跨境學童過境來港返學嘅禁區紙，搞到部分內地學童要過關返學。掌管人口政策嘅政務司司長唐英年，日前終於姍姍來遲走訪邊境學校，聲言要做實地研究，仲向邊境學校拋下「雄圖偉略」。不過，有邊境學校高層聽到唐唐嘅高見後，覺得唐唐思路搭錯線，兼夾不知民情，恥笑佢又天真又傻。
話說唐唐早幾日走訪位於中港兩地邊境嘅深圳市羅湖港人子弟學校及上水鳳溪第一小學，了解吓內地居住嘅港人子弟如何求學。聽講唐唐走訪上水學校時相當亢奮，仲滔滔不絕發表高見，建議喺深圳起多幾間港人子弟學校，等內地港人子弟可以就近入學，唔使再每日萬里長征，希望可以紓緩到現時嘅跨境上學情況喎。
不過，學校代表覺得唐唐嘅建議完全係搭錯線。上水鳳溪第一小學校嘅代表舉例話，即使係居於新界嘅家長，都會推啲仔女去九龍讀書，呢啲係家長追捧名校嘅心態，「家長心儀嘅學校喺邊，佢哋就去邊㗎啦，點會理遠定近㗎！」正如內地港人欣賞本港教育制度一樣，先會堅持要子弟日日跨境上學，所以無論內地起多幾多間學校，都係於事無補喎！