政情：民協搞團購吸街坊票
開講有話「泥水佬做門，過得自己過得人」，做人千祈唔好嚴人寬己。好似由民協立法會議員馮檢基做主席嘅民協社會服務中心咁，上個月開始幫街坊搞團購計劃，仲搵埋善長捐錢為街坊爭取更多優惠，本來服務街坊並無不妥，但係阿基曾經鬧過建制派派嘢，咁就有點兒五十步笑百步嘞，加上區議會選舉臨近，一次過賣大包送咁多優惠畀街坊，難免惹人質疑。
區議會選舉年底就舉行，不論係咪臨急抱佛腳，各個黨派都積極做嘢。民協社會服務中心上月開始，為長者綜援戶等有需要嘅家庭大搞團購，主要貨品好似食米、油、麥皮、午餐肉同廁紙首先打個八折或九折特惠價，之後再由善長再提供額外八折，每戶上限二百蚊，一直搞到善長筆捐款用完為止，所以呢個計劃確係深得街坊歡迎，相信幫民協加咗唔少分。
善款用完就結束 相當含糊
我哋睇過民協社企啲團購單張，除咗寫上「仁愛扶貧團購計劃」外，仲寫上「特別鳴謝計劃捐款人：龐維新先生」。我哋問過阿基，佢話贊助今次團購計劃係龐家基金，至於收咗幾多錢佢就唔肯講，只強調筆錢係無條件嘅，佢答應咗對方將來計劃完結，就會畀番份財務報告畀龐維新交代善款去向。至於計劃幾時結束呢？阿基又話善款用完咪結束囉，相當含糊其辭。
據阿基講，今次之所以搵上龐維新，原來係佢幾年前成功幫仁愛堂一間幼稚園向政府爭取加快批地，今年初呢間幼稚園五周年嘅紀念禮上遇上龐維新，之後大家就相約歎茶，暢談扶貧大計，跟住就誕生咗呢次團購。記得阿基今屆區選險勝後，都鬧過建制派喺區內鋪天蓋地派嘢益街坊，早陣子亦提過自由黨四出派嘢，點知呢條橋最後用番喺自己身上，呢啲係咪即係有口話人，冇口話自己呢？