中環出更：龐愛蘭孖囝囝「寧谷」撐枱腳
身兼藥劑師嘅沙田區議員龐愛蘭（Scarlett）除咗衣着講究外，對飲食都好有要求，好似每逢出入中環同金鐘一帶，佢多數幫襯金鐘港麗酒店八樓間「Nicholini's」寧谷意大利餐廳。最近Scarlett喺澳洲讀書嘅十八歲囝囝林雋彥（Andy Mackinley Lim）放暑假返港，佢兩母子前日就一齊去Nicholini's食午飯撐枱腳，期間有講有笑，不知幾溫馨。
備受城中名人追捧嘅Nicholini's，已有廿一年歷史，唔止被推崇為最傳統嘅意菜餐廳，亦曾獲米芝蓮推介，食物質素有保證。Scarlett形容間餐廳係佢心目中排名前三位嘅心水食肆，佢食晏最鍾意選擇多多嘅半自助餐，必食之選係「龍蝦意大利粉沙律」及「杧果蟹肉沙律」，事關佢好鍾意食海鮮，但又唔想食主菜後有太過飽肚嘅感覺。
Scarlett回憶五、六年前同間餐廳結緣，源於「鵝肝凍批」及「龍蝦意大利粉沙律」，佢盛讚食物美味、地道冇得彈，加上餐廳布置開揚舒適，所以成為餐廳嘅熟客。
Nicholini's仲有個受歡迎之處，就係餐廳嘅初級助理總廚Larry Orias幽默風趣，而且對客人照顧周到，氹到Scarlett好開心。不過，如果Scarlett細心留意，其實Larry對個個客人都咁好㗎！
卓妮