政情：陳永棋轉軚唔撐唐唐？
政務司司長唐英年最近頭頭碰着黑，時不時就被傳媒爆料揭發疑似醜聞，其中鬧得最熱烘烘嘅係被踢爆涉嫌利用政府資源製作競選下屆特首嘅網站。全國政協常委陳永棋一向毫不避嫌支持唐英年，不過佢尋日出席友好協進會活動時先後兩次聽到「唐英年」同「競選網站」等字眼時，就講到明自己完全唔想回答同競選、特首有關嘅問題。
空穴來風 消息靈通
棋哥向來消息靈通，所有表態都唔會係無緣無故，佢今次唔再表態撐唐唐，唔通佢收到啲乜嘢風？
不談個別疑似候選人，棋哥其後喺台上致辭呼籲友好協進會嘅會員同朋友，一定要喺今明兩年選舉前登記做選民。梗係啦，唔係選民又點可以喺選舉裏面發揮影響力？
全國政協委員蔣麗芸（Ann）亦有出席尋日嘅活動，講起佢妹妹蔣麗莉日前被判監，佢話爸爸蔣震感到難過，佢哋盡量唔喺爸爸面前提呢件事，至於日後探訪妹妹嘅安排，佢就話由於一個月可以探兩次，屋企已經排好晒隊。