政情：黃帆風煮飯仔避毒食
前博愛醫院主席黃帆風落莊後，工作冇咁忙碌，早前我哋遇到佢去牛頭角街巿買靚牛肉外，日前又見佢出席健康快車活動，之後仲陪太太過大海幫襯新開張嘅澳門銀河綜合渡假城添！講起近期連台灣都出現黑心食品，黃帆風都話感到無奈，惟有盡量小心啲，佢仲話如果喺香港嘅話，一定會自己買餸返屋企煮飯喎，起碼清楚食材來源同煮法嘛。
對於早前有問題蒟蒻椰果流出市面，黃帆風夫婦都話唔怕乖孫會中招，事關孫仔嘅父母對食品安全睇得仲緊過佢哋喎。講起去澳門玩，原來黃帆風訂房時遇啱所有房間爆滿，要排隊候補，於是被迫延期出發，估唔到度假村新開張旺得咁緊要。其實黃帆風一早應承咗老婆落咗莊之後就周圍去玩，所以澳門有新度假村開張，佢當然要同老婆去歎下世界啦！