一年一度嘅端午節，絕對係各政黨出動嘅好時機。記得去年大批示威者兵分多路，狙擊去睇龍舟賽嘅煲呔曾同三位司長，將政改方案「起錨」大嗌成「超錯」。不過，今年情況明顯比上年溫和，向來行動最激、最熱衷抗爭嘅社民連同人民力量更加冇晒影，唔通因為活動早得滯，佢哋未起身？非也，其實係懶理啲庸官至真。
財爺鬍鬚曾尋日去大埔睇龍舟時，遇上新民主同盟及民主黨成員，抗議佢涉嫌向前政府資訊總監葛輝政治施壓，去沙田睇龍舟嘅官員亦遇到公民力量示威，但兩邊嘅示威者都唔算多。事先張揚會去西貢嘅煲呔曾同去香港仔嘅政務司司長唐英年，就全程冇畀人狙擊，搞到煲呔曾得閒做龍友周圍影相。
我哋尋日問過社民連主席陶君行做乜唔去示威，阿陶話佢哋一方面唔知煲呔曾嘅行蹤，二來經歷完六四連續兩晚示威後，佢哋已近「精疲力竭」，但笑言煲呔曾近排咁多醜聞，佢哋實會搵個公開場合好好招呼煲呔曾。人民力量黃毓民就聲言佢哋要專注搞地區服務，示威呢啲嘢留番畀社民連喎。