上周六支聯會喺維園舉辦六四燭光晚會，大會話有十五萬人參加。咁多人現身，難怪唔少組織都喺現場擺擋籌款。不過，嗰啲並非主辦單位嘅團體，分分鐘係非法籌款，就係因為呢個問題，觸發人民力量成員喺網上展開激辯。
話說街工依舊會將燭光晚會上籌得嘅十分一善款捐畀支聯會，呢個做法曝光後，人民力量嘅擁躉隨即喺社交網站facebook（fb）展開爭論，質疑人民力量籌得嘅善款使唔使交畀支聯會呢？有一派贊成，有一派就反對，眾人喺fb上你一言、我一語，愈來愈有火藥味。
我哋問過支聯會副主席蔡耀昌，佢話佢哋對其他團體喺晚會上籌款，採取「唔反對亦唔鼓勵」嘅態度，但佢哋亦無要求嗰啲團體上繳，當然有團體願意無條件捐錢，佢哋無任歡迎啦。照咁睇，人民力量交唔交數畀支聯會實屬你情我願，使乜為咗咁都要拗一餐吖！