政情：黃家和挑戰張宇人
自由黨張宇人（Tommy）盤據立法會飲食界功能界別議席多年，雖然過去幾屆選舉都遇上各路重量級人馬挑戰，但Tommy依然喺鐵票保送下順利連任。不過，據聞下屆立法會飲食界選舉，將會掀起另一場腥風血雨，事關會有新挑戰者上場同Tommy對撼，而呢名挑戰者嘅來頭絕對不小，更有廠商會喺背後撐腰，佢就係近期喺業界動作多多嘅香港餐飲聯業協會會長黃家和。
自從日本核災難爆發後，本港嘅日式食肆首當其衝大受打擊。代表飲食界嘅Tommy立即做嘢，既率領一眾議員到日式食肆擦餐勁，大派定心丸，又同港府周旋，要求盡快重新啟動中小企信貸計劃幫食肆救亡。另一邊廂，黃家和亦冇偷懶，月前就以香港食品委員會主席身份代表業界，向工貿署申請二百萬元支援基金，同廠商會及日本駐港總領事館等單位合作，大搞一系列活動撐日食，姿態絕不比Tommy遜色。
或代表廠商會爭議席
黃家和係金百加集團主席，經營咖啡、紅茶及食品生意，擔任香港咖啡紅茶協會主席，佢又係廠商會常務會董，近年喺工展會成日見到佢嘅蹤影，可謂相當活躍，難怪政圈傳佢將代表廠商會披甲上陣，挑戰Tommy已經穩坐多年嘅飲食界議席喇。
我哋日前就此問過黃家和，佢亦好大方咁直認有業界希望佢參選立法會，但就話目前距離選舉尚早，仲未拍板會否去馬。黃家和坦言，自己本身做開生意，能否妥善分配時間搞好盤生意同家庭係佢首要考慮，亦要諗吓參選係咪真係有意義。佢又話，自己近十年已積極參與好多同飲食業界有關嘅公職，喺唔同渠道表達意見喎。
不過，當問到點睇Tommy喺議會嘅表現時，唔知黃家和係咪怕得失業界夥伴，佢即時耍手擰頭咁話唔評論，只係慨嘆隨着議會氣氛愈來愈政治化，飲食業界面對嘅困難又畀其他行業多，要處理好業界嘅問題需要好高技巧喎。黃家和有冇具備呢項「高超技巧」，同埋佢又會否如傳言般同Tommy喺下屆選舉鍊過，大家就要放長雙眼睇好戲喇。