中環出更：食意菜賀壽 張德祥驚喜
意大利菜係唔少人心目中嘅至尊美食，尖東帝苑酒店嘅「Sabatini」便深受城中名人追捧。 早前一個周末，卓妮就遇到高檔西服定做品牌「詩閣」（Ascot Chang）董事總經理張德祥（Johnny），同太太范元芳、囝囝張宗豪喺Sabatini午膳，原來當日係Johnny六十九歲生日，餐廳突然送上生日糕點製造意外驚喜，令壽星公Johnny感動不已。
Johnny一家人幫襯Sabatini多年，對餐廳嘅出品讚不絕口，由前菜「巴馬火腿伴香瓜」、「風乾牛肉」到主菜「番茄海鮮天使麵」，兩夫婦都百吃不厭。張太勁讚巴馬火腿嘅肉香配搭清新嘅蜜瓜果香，味道冇得彈。估唔到張氏夫婦氣質優雅登對外，連食嘢嘅口味都咁一致喎。
部長送上焦糖脆餅
當Johnny一家三口食到尾聲之際，餐廳資深部長連振偉（Ben）突然送上一碟Johnny至愛嘅意大利焦糖脆餅「聖安娜」，上面有「Happy Birthday Johnny」字句，仲插上支蠟燭，壽星公對突如其來嘅驚喜感到相當意外。阿Ben話，佢會記低熟客嘅重要紀念日子，適當時候為客人帶來驚喜。卓妮都要祝Johnny生日快樂！
其實當日一家三口主要傾吓詩閣第二代自創年輕品牌「TCNY」，Johnny囝囝張宗豪現任「TCNY」總經理，主力打理呢條品牌路線。宗豪打算將「TCNY」轉型主打男裝市場，為城中型男提供高檔潮裝，做爸爸嘅Johnny對新構思好支持，佢話明白年輕人有自己一套審美觀，所以放手畀下一代去闖吓喎。
卓妮