政情：梁馮令儀帶名醫遊名勝
有「放射科女王」之稱嘅香港放射科醫學院創會會長梁馮令儀，最近為心臟科忙到不可開交，事關佢大玩Crossover，將心臟同放射兩者結合。事緣今屆由佢做大會主席嘅「第五屆亞洲心臟血管影像國際學術研討會」，除咗有心臟學科研討外，還會加插放射科同輻射臨床知識。現時已有三十幾個國家同地區嘅醫生報名參加，咁多名醫到港，梁太除咗搞好場騷外，仲要盡地主之誼帶佢哋遊覽香港名勝。
為咗搞好呢個研討會，梁太同另一位大會主席、香港心臟專科學院蔣忠想醫生忙足兩年多，除要搞好研討會日程外，仲要幫來自其他地區嘅參加者安排機票、酒店同膳食，又要為佢哋同行嘅家眷安排節目。梁太話，咁多名醫來港，推廣香港都係重要一環，所以佢特登安排咗本地團畀佢哋暢遊山頂、赤柱、淺水灣等名勝。
不過，梁太笑言通常都唔會有人參加，但都要作好準備，萬一有一個嘉賓想去行吓，都有貨交，因為唔可以失禮香港呢個好客之都美譽嘛！