政情：范太借光龍摸黑快閃
近期各個疑似特首候選人都各有動作，經常趁住出席活動曝吓光，但尋日就有啲例外，因為撞正「六四」呢個敏感日子，個個避得就避，唯獨全國人大常委范徐麗泰照樣出席「健康快車」嘅慈善活動，結果引來大批傳媒到場守候，問佢對「六四」嘅睇法。不過，最終大家連發問嘅機會都冇，事關范太喺一個「夜光龍」嘅節目中摸黑快閃。
范太尋日以一身黑色西裝褸配黑色西褲嘅打扮出席活動，同健康快車創會主席方黃吉雯嘅鮮橙色連身長裙打扮比較，形成強烈對比。范太一早就透過工作人員話唔會接受訪問，但在場傳媒唔理咁多，一於等到活動尾聲。正當大家一窩蜂擁上主禮台前之際，突然全場一黑，大會安排咗一條螢光彩龍出來表演。
點知表演完着番燈後，范太已消失得無影無蹤，大家都嚇到呆晒，估唔到由熄燈到開燈前後不足一分鐘，范太竟然好似魔法幻影咁離開咗現場，真係估佢唔到喇。