政情：工聯兵行險着隨時雙失

工聯會本來嘅直選大計，係由王國興角逐連任新界西、黃國健角逐連任九龍東，原屬勞工界功能界別嘅潘佩璆同葉偉明，就分別空降港島同新界東，九龍西就要再物色合適人選出戰。目前距離選舉只有約十五個月，九西仍未搵到任何有勝算嘅人選，潘佩璆亦做極都做唔起，貿貿然出戰港島只會等同送死。據聞其他有意喺港島出選嘅建制派團體，早前就紛紛透過西環向工聯會施壓，希望佢哋可以放棄派人出選港島，以免分薄票源，大家攬住一齊死。

工聯會亦有自知之明，近日不斷放風話本身係老人精神科醫生嘅潘佩璆，需要兼顧醫院工作，好難全心全意投入直選。但佢哋又唔甘心就咁放棄出戰港島，聲言會改派四名現任議員中、知名度同資歷都最高嘅王國興轉戰港島。至於王國興原本喺新西個位，就屬意由上屆排喺王國興隊後嘅麥美娟頂上。

盼借助嫻姐 谷高支持度

其實王國興原本喺港島出身，植根於傳統左派票倉北角區，所以今次佢落港島可算係「空降」，又可算係「回巢」。不過，港島區向來係各大黨嘅兵家必爭之地，競爭極為激烈，次次改選都有重量級人物黯然落選。而且傳統上港島區有較多中產票及泛民主派票源，對草根同愛國形象都深入民心嘅王國興相當不利，加上佢「移民」咗去新西咁多年，港島選民係咪再撐佢將成疑問。

至於接替王國興上陣嘅麥美娟，喺葵青區嘅知名度同支持度都唔差，但出到成個新西大選區，就同王國興差咁幾皮，唯一優勢係新西向來較少女將，可望執番唔少婦女票。據聞工聯會內部有個諗法，希望可以借助參選超級區議會嘅「工聯之寶」陳婉嫻，一次過谷高工聯會喺全港五區嘅支持度，帶起形勢較弱嘅王國興、葉偉明同麥美娟。呢個如意算盤係咪打得響，一年後自有分曉！