中環出更：拆僭建破財 孫太逛街散悶
僭建醜聞纏身嘅教育局局長孫明揚，尋日出席電台節目時重申會承擔住所僭建嘅所有責任同後果，相信其中一項承擔就係搵人拆走僭建物，清拆工程亦已展開。話時話，位於跑馬地菽園新臺嘅孫宅，近年真係唔多安寧，孫太鍾小芬同孫公先後患病，近期又被揭發有僭建，但孫太性格樂天，一於去行街減壓兼散咁啲悶氣。
卓妮前日下午見到孫太喺中環太子大廈間「惠記珠寶」打躉，孫太坐喺飾櫃前同店員打牙骹傾到雞啄唔斷。查實孫太係該店嘅熟客，不時幫襯買珠寶、銀器，所以職員都好識做，斟杯茶畀佢慢慢歎。可能飲得水多，孫太突然人有三急。卓妮趁佢去完洗手間後，就上前打招呼傾幾句，問吓孫宅拆僭建嘅進度。
幾萬蚊清拆費冇走雞
孫太話，工程人員現正清拆屋外僭建物，幸好沙塵唔係太大，對養病中嘅孫公冇乜影響。不過，拆除僭建物後要鋪番啲地磚，之後又要上番油漆，預計工程至少搞一個月。埋單計數「科水」幾多呢？孫太就話未收到張帳單，總之使幾萬元一定冇走雞！
破財幾萬元，幾乎買少件首飾，聽落幾肉赤，但孫太就好豁達話：「冇所謂啦，拆咗先！」佢又無奈話根本唔知屋外僭建物何時加建：「好多人買樓，都唔知上手或者再上手業主僭建過啲乜，總之人人自危啦！」話雖如此，孫公幾年前已接到屋宇署警告甚至釘契，但一直愛理不理，至今要道歉兼破財，算係一個教訓囉。
卓妮