立法會議員張文光（張文），上周五向其他議員傳閱咗一批無鰭鯊魚屍相片，批相殘忍血腥到極，睇咗都唔開胃，咁做都係為咗以「靠嚇」去呼籲大家唔好再食魚翅。不過，佢嘅民主黨友甘乃威同涂謹申就喺本周一出席咗一個有魚翅菜式嘅慶功晚宴，唔通佢哋有翅落肚就唔撐張文？
話說阿涂同甘乃威一直幫班雷曼迷債苦主向銀行追討賠償，班苦主成功追討後就筵開十席慶功，仲請咗佢哋食飯以示答謝。不過，睇吓當晚張菜單，入面竟然有味「紅燒花膠雞絲生翅」，雖然好和味，但如果兩人真係有魚翅啷口，咁就同之前張文呼籲議員抗拒食翅嘅行動大唱反調喇。
我哋試過打電話問過阿涂，究竟當晚有冇食過魚翅？阿涂就話，當晚佢遲大到，去到有人預留咗啲食物畀佢，但佢就唔肯定有冇食過魚翅；佢強調，從來冇應承過張文響應戒食魚翅喎！至於甘乃威就冇回應嘞。