政情：華叔新書顯領袖本色

提攜肥仔明 點醒阿涂

華叔熱心提攜後輩，又經常幫佢哋出謀獻策，仲成日寫書法勉勵大家，所以三十個華叔生前嘅民主戰友就喺新書中以文字懷念同華叔嘅點滴回憶。

紀念集中有人提到，立法會議員李華明廿年前參加立法局地區直選時，由於係新丁一名，知名度極低，華叔就叫肥仔明淡定啲，好似老竇帶住個仔拉票咁，難怪肥仔明都自嘲話：「華叔係可口可樂，我就係芬達橙汁。」

華叔有勇有謀，經常過番幾招提攜後輩。當年范徐麗泰同黃宏發爭立法會主席時，有記者問涂謹申支唔支持范太，撐黃宏發嘅阿涂就即時表態，事後華叔就鬧阿涂就算唔支持都唔應該講出嚟，費事遭人哋報復，應該「適當時間一棍打殘佢」。

除咗出謀獻策，華叔又經常送墨寶畀黨友，曾經寫過文天祥《正氣歌》詩句賀何俊仁律師樓開幕，而「阿牛」曾健成當年仲係黨員時，華叔都有為佢嘅議員辦事處開幕揮筆㗎。

順帶一提，華叔嘅書法墨寶亦由即日起至今個月底喺石硤尾賽馬會創意藝術中心七樓展出。