政情：黃家和變塑化劑苦主
食品含塑化劑風波不斷擴大，令到仲未走出最低工資影響嘅餐飲業界，無端端多咗一筆支出，就係化驗費喇！香港餐飲聯業協會會長黃家和（Simon）尋日出席一個活動時話，業界為咗令消費者安心，又要額外支出一筆化驗費去證明產品不含塑化劑，淨係佢旗下金百加集團，就有四十幾種產品要化驗，大呻業界搵食愈來愈艱難。
Simon間公司主要從事咖啡、紅茶等生意，旗下唔少產品來自台灣，所以受到今次塑化劑事件衝擊。佢話，原本食品添加起雲劑係合法嘅，但係不法商人用較便宜嘅工業用塑化劑取代起雲劑，搞到佢要為產品「驗身」，每一樣產品化驗費就要一千蚊，總共破財成四萬多元。
雖然Simon牙痛咁聲，但原來化驗起雲劑嘅費用已經唔算貴，事關早前實施嘅營養標籤新制度，每樣產品嘅化驗費就要三至四千元，全港約有七萬種食品，整體支出就高達二億八千萬元。早幾年爆發三聚氰胺事件，業界同樣要化驗自保，難怪佢呻話，業界愈嚟愈難捱，但係化驗所就商機無限。