政情：大花筒議員累街坊
通脹殺到，全港打工仔都渴望大幅加薪，立法會議員亦唔例外，佢哋一直批評政府給予議員嘅薪酬同工作津貼嚴重不足，難以營運足夠辦事處同聘請有質素嘅助理，令議員難以有效監察政府同服務市民，要求喺下屆立法會、甚至下個立法年度大幅加薪同加津貼。不過早前有多名議員被揭大花筒浪費公帑，用納稅人嘅血汗錢狂印利是封、紙扇同毛巾，就打亂晒立法會呢個加薪加津貼大計。
立法會議員酬金及工作開支償還款額小組委員會，尋日公布咗一系列調查數據，顯示議員申領各項津貼嘅金額，同市民對議員表現嘅不滿程度一樣，都係一年高過一年。例如每月近十三萬元嘅實報實銷辦事處營運津貼，去年嘅平均申領比率就高達九成三，比前年上升三個百分點，有五成四議員攞足接近十成津貼額，比前年急升十七個百分點。
申酬酢交津創新高
除咗辦事處津貼，議員每個月仲有一筆為數逾一萬三千元嘅非實報實銷酬酢及交通津貼，畀佢哋搭車同食飯應酬之用，前年嘅平均申領比率已經高達九成，舊年再創新高升至九成二，有七成一人攞足十成津貼額，比前年上升三個百分點。究竟呢個升幅係純粹因為香港交通同膳食費貴咗，定係班議員唔理咁多攞到盡，真係只得佢哋自己先知。
六十名議員當中，去年有一成、即六人申報使凸咗，要自掏腰包倒貼辦事處開支，平均每人使凸九萬幾蚊。調查仲特別補充，相信有唔少議員亦有使凸咗但冇向秘書處申報，或者因為自己冇錢倒貼而被迫慳住使，總之就係錢唔夠使，要求政府大開水喉喇！
當然我哋唔會一竹篙打一船人，的確有啲議員用津貼用得好有道理，但係呢類人又有幾多呢？最近民建聯主席譚耀宗被踢爆濫用津貼印成百萬個利是封，最後仲派唔晒添，副主席劉江華整二萬幾把「做服務如風不息」摺扇，黨友張學明又使十幾萬嚟派毛巾，陳克勤就印工作報告，依家仲想攤大手板要求大幅加薪加津貼，廣大納稅人肯定會唔順氣，政府亦有大條道理拖延拒絕。今次真係黑狗偷食、白狗當災囉！