中環出更：陳嘉容潮改長裙迎夏日
擁有四十五吋長腿，唔少女士夢寐以求，不過雙腿咁長，都有煩惱，事關好難買到稱身嘅長裙同長褲。好似名模陳嘉容（Eunis）咁，經常遇到買裙、褲嘅煩惱，卓妮早幾日就喺中環遇到佢去改衣店改長條裙。
當日下午四點幾鐘，Eunis同助手一齊行上萬邦行一樓，原來佢去改衣店攞番條裙。
今年夏天興長裙，Eunis當然要先着為快，所以未到夏天已經入定貨，奈何喺香港要買一條啱佢腳長嘅長裙，唔係咁容易，惟有攞啲新裙去改衣店加長。
「美麗達人」北上授課
Eunis去嗰間改衣店已經幫襯咗好耐，對該店嘅手工好有信心，佢亦好滿意攞去改長嗰條白色長裙，雖然無得即場試穿，但佢都忍唔住「揚兩揚」畀助手睇，表現得好滿意。攞完裙後，佢就過隔籬間Jenny Bakery買咗兩盒杏仁曲奇，原來佢係買返公司請同事做下午茶。
Eunis衣着打扮向來高貴，最近被封為「美麗達人」，到北京同上海嘅大企業做導師，指導員工衣着打扮同儀態，為求盡善盡美，每次佢都要預先備課，仲帶多兩大篋衣飾上去，佢笑言每次都帶晒身家財產上去，希望教大家配襯出最適合自己嘅造型喎。
卓妮