一個目中無民的看守政府，民望插水是必然的，而且周身病。依老朽初步觀察，關鍵時刻挺不起來的，是骨病；水波不興，見慣不驚，聽甚麼都說冇牙力的，是老病；該管不管，見運動才動的，是部門病；只講數字不講實效，是浮誇病；目中無人，天下唯我的，是獨夫病；有錯死撐，文過飾非，是傲慢病；三天兩頭，一味要威只顧面子，是折騰病……
以上世病百態，歡迎眾高官對號入座。哎唷！原來個個五勞七傷，都怪平時唔做體檢，一驗之下才知周身是病。僭建風暴變成一個超級龍捲風，由高官、議員、名人、巨賈一路捲到煲呔曾，人人自危，煲呔曾還死撐，聲稱○六年拆除簷篷及花架後，屋宇署再無要求他處理其他部分，是以他認為露台加設玻璃不一定違規，不過會聽「勸喻」。
屋宇署的執法準則確惹人疑竇，何以有啲要拆，有啲就唔使拆？有人譬喻得好，車主喺唔應該泊車嘅地方泊車，被抄牌係「違例泊車」，如果冇被抄牌，是否就無違例呢？坦白講，如果上下左右單位都冇咁做，你做了不異相嗎？
馮夢龍《古今笑》有則「金蓮盆」，說官至宰相的貴人段文昌平素生活已極奢侈，但還感到不足，需要以金盆洗腳來實現對生活的欲望。可見，人的欲望如不用道德來抑制，將是永無止境的。現今煲呔曾的「圍封玻璃露台」，即使屋宇署冇叫拆，正當僭建風頭火勢，作為特區首長，是否要「蝕底」少少做吓示範？有啲嘢路人皆見，何必賺到盡？