政情：張佐華成功戒煙25年
好多人知道吸煙壞處多，但戒煙難度高，除非好有決心，否則多數都係患病後才戒煙。好似東華三院主席張佐華都做過煙民，佢話十幾歲時畀當時嘅香煙廣告型格形象吸引，開始咗十幾年嘅煙民生涯，直至有日半夜咳嗽咳到天光都唔停，辛苦到連嘢都講唔到，頓覺吸煙對身體影響好大，所以決心戒煙。
張佐華日前出席一個活動時話，至今已戒煙廿五年，最近佢為東華第五間戒煙中心開幕主禮，自然更有說服力。佢奉勸各位，千祈唔好覺得吸煙好有型，仲話如果大家真係戒唔到煙，不妨去佢哋嘅戒煙中心，事關成功率高達百分之四十。
同場仲有總理王賢誌，最近少咗見佢做司儀。王賢誌話，自從做咗東華總理後，擔心幫其他慈善機構做司儀有角色衝突，所以接少咗司儀工作，一心做好東華事務。