政情：范太CY面左左零交流
尋日係洋務工會九十周年會慶，工會請咗全國人大常委范徐麗泰同行政會議召集人梁振英（CY）同台做主禮嘉賓。兩個疑似特首候選人碰頭，合照時已經尷尷尬尬，點知咁啱得咁蹺，兩個人仲要被安排坐埋一齊，CY惟有擰轉面唔望范太，大家全程零交流。
兩位疑似特首候選人同場出現，大家都想問吓佢哋對最近掀起嘅僭建風波有乜睇法，但范太同CY嘅態度就截然不同喇。范太講到僭建，就話香港位置高嘅公眾人物要比一般人更加小心、更加要守法。咁佢自己嘅物業又有冇僭建呢？范太就好有技巧答話，冇收過屋宇署任何通知喎。
相反，之前講過會「當仁不讓」嘅CY，尋日就避談所有具爭議話題。問佢點睇煲呔曾祖屋僭建，佢就話唔講；問佢六四議題，佢又話講過；問到點睇范太早前講下屆特首要面對為《基本法》第二十三條立法問題，佢更加踢個波畀范太話︰「請范太繼續（講）啦！」把口撬極都唔開。