民記首先捲入僭建風暴，唔少黨員間屋都被踢爆有僭建，民建聯一時間成為咗「僭建聯」，譚Sir要求黨內嘅立法會議員檢視自己間屋，確保無僭建。話口未完，是非燒到譚Sir自己身上，佢被揭發濫用公帑，印咗一百萬個利是封嚟派街坊。最新嘅發展係，譚Sir被人質疑早年做僱員再培訓局主席時明益自己友，使橫手畀港專為再培訓局辦課程。
由九十年代至今都係港專校董主席嘅譚Sir，喺九七至○五年做再培訓局主席八年，最近畀人翻舊帳，譚Sir就誓神劈願話自己冇負責審批課程，仲拉職工盟落水，話職工盟為培訓局辦嘅課程仲多。都係嗰句，做人行得正企得正，咪乜嘢是非都冇有怕囉。