政情：朱耀明讀神學服侍基層
話咁快又到六四燭光晚會，司徒華嘅好朋友朱耀明牧師尋日接受電台訪問時話，六四喺香港唔止係燭光咁簡單，香港曾經都喺協助民運人士方面做過好大嘅努力。佢仲話，選擇做牧師都係因為細個喺大陸土改時期批鬥過人，後來聽到從內地逃命嘅同胞嘅苦況，加上自己做擦鞋仔時都瞓過街捱苦，所以就決心以服侍低下層人士為抱負。
朱耀明身世坎坷，細細個已經係孤兒，親戚仲差啲將佢賣咗畀人，好彩嫲嫲將佢帶返大陸鄉下。不過，當時正值文革，就算種棵菜都唔可以私有，過住飢餓嘅生活。
年少無知打過地主
佢仲話嗰時年少無知，打過地主。後來喺深水埗做擦鞋仔時，聽到街坊講喺內地逃命來港嘅慘況，自己都好傷心，於是決定去台灣修讀神學服侍基層。
朱耀明除咗係牧師，亦喺八九年六四事件中幫過唔少民運人士，佢仲想將呢啲事記載落來，希望後人可以從中搵到事件嘅脈絡。