政情：李鋈麟包粽好耍家
糉葉飄香嘅端午節臨近，東華三院一班董事局成員尋日特登齊集包糉，為深水埗低收入家庭及獨居長者送上節日溫暖。東華主席張佐華、總理王賢誌都坦言唔識包糉，雖然包得個樣唔靚，但勝在有一顆愛心。現場包得最耍家嘅係總理李鋈麟，原來佢細個經常幫爸爸包過百隻糉送畀街坊，稱得上係包糉高手。
李鋈麟話，細個時爸爸喺土瓜灣開雜貨舖，每逢端午節就會包糉派街坊，佢閒閒哋包過百隻，無論係鹹肉糉、梘水糉定係裹蒸糉，都難唔倒佢。尋日佢親自示範，見佢好熟手咁攞起啲糯米、豬肉、蛋黃等材料，話咁快就搞掂一隻。不過始終多年冇包過糉，手勢難免有啲生疏，仲包咗隻佢笑稱係「鹿頭糉」嘅怪糉出來。
另一位總理鄧耀邦都落手落腳包愛心糉，佢係「舖王」鄧成波嘅囝囝，依家仲讀緊中醫碩士。佢話，雖然中醫理論唔主張多食糉，認為糯米難消化，有熱毒，但應節食啲都唔怕。