政情：黎年順手同煲呔曾「拆檔」

申訴專員黎年本身只想向村屋開刀，點知就誤中副車，順手拆埋上司煲呔曾嘅玻璃窗，唔知佢又會唔會好似前政府資訊科技總監葛輝咁，收到啲「來自比財政司司長更高級」嘅政府壓力呢？

申訴專員黎年喺四月發表新一份報告後，事件一發激起千重浪，涉嫌僭建嘅議員同高官先後進佔每日報章頭條。本報尋日仲獨家揭發煲呔曾同其妻共同擁有嘅麥當勞道碧雲樓單位涉嫌僭建，自行將原屬開放式嘅露台以玻璃窗完全圍封，卻未有按法例向屋宇署入則申請，而佢亦曾喺露台外違規搭建簷篷同鐵花架，高官知法犯法，罪加一等。

○六年收信 唔拆圍封玻璃

煲呔曾尋日聲稱，屋宇署喺○六年曾發信要求佢清拆單位外嘅簷篷同窗外花架，佢亦即時拆除，但對同樣係違法嘅圍封玻璃卻視而不見，企圖博大霧蒙混過關。同樣捲入僭建風暴嘅教育局局長孫明揚，亦曾講過屋宇署喺○六年發信要求佢清理僭建物，但佢就冇理到。當時屋宇署隸屬房屋及規劃地政局，而當時該局常任秘書長正係梁展文，真係夾都冇咁啱。

黎年當日質疑港府針對村屋僭建問題「大細超」，冇盡力要求違規人士清拆僭建物，相信只係預計到會辣㷫一眾擁有丁權嘅鄉事派。班鄉紳激到要搞「流血革命」保家園，可能都仲喺黎年嘅盤算之內，但最終火燒連環船搞到上司煲呔曾一身蟻、祖業嘅玻璃窗都分分鐘要清拆，就肯定始料不及嘞。

煲呔曾嗰個涉嫌僭建嘅單位係佢爸爸曾雲嘅舊居，佢當年買下單位，無非係想懷念老父，但今次搞到祖業「不保」，唔知煲呔曾會唔會哭斷腸？不過，佢咁鍾意做龍友，又追上潮流用iPad，最多喺個祖業露台嘅玻璃窗清拆時，早啲去霸個靚位影番輯相留念囉，或者放喺iPad做桌面Wallpaper（牆紙），得閒望吓憑弔一番，都係唔錯嘅選擇。