中環出更：醫專會開Ｐ潘德鄰古琴獻技

王賜豪心驚驚食飯

醫學界Party上，星光熠熠。行政會議成員梁智鴻（金刀梁），骨科名醫高永文及醫管局主席胡定旭齊撐場。壓軸好戲係潘德鄰獻技，原來佢學古琴廿多年，手上明朝古董古琴，有五百幾年歷史，係師傅所送。潘醫生對琴同着衫都絕不求其，參照明朝古籍後，返內地搵專人做衫。

近期日本、台灣食品齊爆恐慌，身為醫生嘅同珍醬油第三代傳人王賜豪都話，出街食飯提心吊膽，最驚食到用「萬年油」煮嘅餸。佢慨嘆話，中國經濟起飛，大家揸名車「波子」，但食水、食物就統統響警號，認真唏噓。香港水域捕獲輻射烏頭，愛食手撕凍烏頭嘅骨科名醫高永文就話，暫時唔食住，睇定啲再算。

醫管局行政總裁梁栢賢（左）同「醫專會」副主席鄭淇德（右）言談甚歡。

晚宴上高朋滿座，左起：王賜豪姐姐、梁智鴻、全國人大常委范徐麗泰、食物及衞生局副局長梁卓偉。

玩具大王蔡志明太太蔡李惠莉都嚟撐場，原來蔡太係「醫專會」榮譽會長。講起「紫荊女俠」派錢扶貧。蔡太話茫無頭緒，唔知對方係邊位，但提議佢將錢捐畀保良局，等多啲貧苦大眾受益喎。

「醫專會」嚟緊大計多籮籮，副主席鄭淇德醫生話，將會同青松觀合作，喺深水埗開設慈善牙科診所，可望喺年底投入服務。

卓妮