政情：王征自爆養生靠游水食菜
亞視投資者王征自從去年三月入亞視做「義工」之後，是是非非未停過，除咗股權紛爭之外，又捲入亞視另一股東蔡衍明及無綫電視嘅官司，認真「惹火」，連佢都笑稱咁大個人好少見咁多紛擾。不過佢無論幾時都咁面色紅潤，原來佢有自己一套生活方式。
王征尋日出席亞視一個活動時，自爆保持心境愉快、臉色紅潤嘅養生之道，原來全靠佢保持原始、老式嘅生活習慣。佢話無論夜晚應酬到幾點，佢朝朝六點半就起身，一口氣游露天泳池十個塘，然後食兩盒美國蔬菜沙律加一杯紅蘿蔔汁，咁就去大埔返工喇，仲係第一個返到公司嘅高層添！亞視咁多紛擾，難得佢依然笑口常開，仲形容亞視收視愈嚟愈好，係「在紛擾中崛起」。
出席同一個活動嘅中國人壽（海外）副董事長兼總裁劉廷安話，香港好多無名英雄，佢希望市民一齊尋找身邊嘅感動故事，為呢個繁忙嘅國際城市增添溫馨。