中環出更：蔡李惠莉掃DVD陪老公煲碟
「玩具大王」蔡志明太太蔡李惠莉話，老公唔鍾意去戲院睇戲。梗係啦，蔡家大宅設有豪華私人影院，大宅主人又點會願意出街睇戲？喺咁嘅情況下，揀影碟嘅責任，好自然就落喺大宅女主人，即係蔡太身上。為老公買影碟，原來都係福布斯富豪太太生活嘅一部分。
早幾日下晝四點幾，蔡太現身中環，佢忙裏偷閒，喺中建大廈買完影碟又去睇鞋，結果佢買咗幾隻影碟，反而喺鞋店就空手而回。話說嗰日着住豹紋中褸、手攞住豹紋手袋嘅蔡太，首先喺中建大廈一樓嘅HMV揀影碟，佢攞起每一隻影碟，都會好仔細咁睇吓包裝後面嘅劇情介紹，就係咁樣細心睇，蔡太企足大半個鐘都唔怕攰，最後攞咗七、八隻DVD去埋單。
中建大廈嘅街舖，鞋舖成行成市，蔡太買完影碟後，行咗入去其中一間「視察」，不過五分鐘到就出返嚟，明顯鞋舖呢季嘅出品，唔係咁啱佢心水。
唔鍾意去戲院
蔡太後來同卓妮講，嗰日佢係幫老公蔡生買影碟，原因係蔡生唔鍾意去戲院睇戲。其實蔡家大宅嘅私人影院夠晒靚，影音設備又夠正，所以萬事俱備，欠嘅就係好電影。
蔡太當日一口氣掃咗成七、八隻碟，片種繁多，卓妮眨吓眼，已經發現有兩套風格各異嘅電影，包括《泳池情殺案》同《末代浩劫》，前者係法國名導Francoise Ozon嘅作品，講嘅係游離於虛幻與現實之間嘅懸疑情殺案，後者喺二○○六年角逐過奧斯卡金像獎，係有警世意味嘅科幻片。
蔡太買咗七、八套唔同嘅電影，肯定總有一啲啱蔡生心水，見到蔡太呢位咁細心嘅老婆，卓妮都要寫個服字。
卓妮