政情：何君堯同煲呔曾唱對台
煲呔曾早前批評有政黨濫用司法制度，新任律師會會長何君堯尋日話，市民提出司法覆核係反映對行政措施不滿，不平則鳴，然而司法覆核只能治標，不能治本，解鈴還需繫鈴人，「政策唔完善的地方應該在政策方面改善」。即係話政府唔想人去司法覆核，不如搞好啲特區政府嘅政策。
何君堯尋日接受電台訪問時話，本港每年通常有一百宗司法覆核案件，而司法機制已經設有門檻防止市民濫用，「無理取鬧都上唔到法庭」，所以已經有晒保障。
何君堯早前提出修改鄉委會會章，令到鄉議局主席劉皇發無法連任屯門鄉事委員會主席，何君堯自爆自己阿爺何耀谷同發叔好老友。何君堯自言，佢上年十月先做村長，然後再入主鄉委會，依家做埋律師會會長之後，仲話有興趣參加明年嘅立法會選舉添。