政情：任亮憲狙擊陶君行？
早前捲入非禮強姦案嘅「維園阿哥」任亮憲成功甩難後，動作頻頻，不但重返發迹地《城市論壇》，日前更參加人民力量搞嘅退修營，訓練一班有意參選嘅成員如何辯論。喺人民力量仲未有一官半職嘅任亮憲更自爆，佢已獲黨委派負責黨喺九東嘅選舉布局，唔知佢又有冇意狙擊喺九東出身嘅社民連主席陶君行呢？
人民力量喺過去兩日搞咗個退修營，訓練一班無選舉經驗嘅成員議事技巧，等佢哋喺區選挑戰民主黨或民協成員時，都唔使太失威，靠激辯成名嘅任亮憲，自然係「教練」嘅不二之選。任亮憲仲自爆獲黨委以重任，負責「統戰」人民力量成員最少嘅九龍東。佢直言自己雖然有做開地區工作，但都以九西為主，今次被調派九東，將要從頭做起，但唔會畀自己太大壓力喎。
九東一直係阿陶嘅盤據點，任亮憲今次進軍九東，會否以狙擊阿陶嚟打響聲勢？任亮憲對此笑而不答，直言人民力量對會否狙擊社記仲未有定案。若果二人開拖，大家就有好戲睇嘞。