中環出更：朱玲玲怕輻射唔敢食魚生
繼日本輻射食品後，台灣食物又爆出受有毒塑化劑污染。最美麗港姐朱玲玲都怕禍從口入，未敢盡情吃魚生，但產自其他地方嘅生蠔，就係佢「飛佛」。
崇尚健康嘅朱玲玲，皮膚Keep得白滑有光。生蠔含豐富蛋白質，營養又養顏。尋日沙田馬場舉行「渣打賽馬日」，朱玲玲同老公拍拖到場，他應主人家邀請，喺廂房大擦自助餐，一嚟就攞生蠔，仲夾埋畀老公食，夠晒Sweet。但講到日本魚生，就耍手擰頭。朱玲玲話，輻射災難後，只食過一次日本菜。呢排人人都較鬆懈，佢都未敢放膽食。
講番馬場，「深圳王」黃楚標隻團體馬「最著數」喺第二場勝出。呢匹馬，貿發局主席蘇澤光等人都有份，齊齊捧走獎金逾三十六萬元。黃楚標眼光獨到，落注買獨贏同位置，袋多兩萬元，認真和味。
賭王「爆冷」贏近百萬元
但數獎金，就唔及賭王嘞！佢隻愛駒「爆冷」喺第八場「渣打冠軍暨遮打盃」中跑第三，獎金高達九十六萬元。衝線一刻，只見四太梁安琪千金何超欣喺看台上肉緊地吶喊助威，未見四太，超欣喺頭頂打隻大蝴蝶，活潑可人。
馬場之大，撞到熟人機會特別多。太子珠寶鐘錶執董朱繼陶就巧遇香港錶廠商會會長蘇永強。兩男相遇，十足久別重逢。蘇生攬住朱生膊頭話：「前排傳我哋不和，其實我哋不知幾好傾。」說畢，來張頭貼頭合照，粉碎不和傳聞。
卓妮