有病梗係睇醫生o架啦，睇完醫生通常都要食藥，之不過香港係一個光怪陸離嘅妖獸都市，好多時候一食藥就出事。好似○九年咁吖，公立醫院用嘅痛風藥別嘌醇居然含有毛霉菌，八名癌症病人懷疑服後死亡。痛風藥之所以發霉，一大原因係藥廠出錯，二大原因係衞生署失職，監管到甩頭甩髻甩皮甩骨。
由於當年發生一連串藥物事故，後知後覺嘅特區政府先至如夢初醒，咦，衞生署對於監管西藥原來係咁弱雞o架？於是乎咯喎，補鑊行動展開嘞，政府批准衞生署增設六十三個公務員職位，加強監管西藥咁話。
招兵買馬理論上應該有少少幫助嘅，問題係衞生署招來買去竟然搵唔到兵兵馬馬，大部分新設職位懸空至今。到底係苦無人才呢，定係雞肋冇人吼？功夫茶真係唔知，淨係知道衞生署做咗一個蜀中無大將、廖化作先鋒嘅荒謬決定：將原本任職衞生署助理署長嘅退休官員梁熾輝一嘢翻閹，聘任為新設嘅顧問。
如果係人盡其才，翻閹都未嘗不可，弊就弊在梁熾輝未退休之前負責嘅工作只係行政、策劃以及審計等等，同規管西藥無關。打個譬喻吖，曾蔭權夠巴閉喇啩，負責行政工作做到扶搖直上最終入主禮賓府，之但係你可唔可以叫佢去做衞生署署長呢？唔好玩啦，煲呔曾叻極都冇醫療資格，叫佢去做全城掃街清潔大隊長勉強可以，負責公共衞生肯定害死人。
對於聘任梁熾輝做顧問監管西藥，關注社會事務團體關懷香港召集人郭家麒就批評嘞，此舉係「風馬牛不相及」，令公眾質疑衞生署私相授受，為退休官員安排油水位。郭家麒又認為，衞生署有職位空缺而無人勝任，反映「呢個部門真係好唔掂」，要求衞生署解釋大部分負責規管西藥嘅新增職位長時間懸空嘅原因。立法會議員潘佩璆講得仲白，佢話衞生署為個別退休官員造就機會係「明益自己人」。
嗱嗱嗱，呢鋪大劑嘞，衞生署明益自己人固然係國家領導人口中「道德滑坡嚴重」嘅一種表現，除此之外更加危害公眾利益。試想想，由一個冇專業才能嘅退休官員幫你把關，監管西藥有乜可能唔係繼續甩頭甩髻甩皮甩骨？喺咁嘅情況之下，藥物事故簡直係危機四伏，病人隨時食錯藥！
唉，功夫茶苦口婆心再一次奉勸世人，保重身體，注意健康，切勿生病，事關一病就要睇醫生食藥，一食藥就有機會畀衞生署之流嘅醫療官僚害到兩腳一伸瓜老襯！