社民連立法會議員梁國雄（長毛）不論對中央政府定係泛民主派同僚，都係有錯就鬧爆絕對冇面畀。不過有讀者向本報爆料，話喺○四年四月某個晚上，長毛同一批「中共中央組織及統戰部港澳辦重要人物」，喺尖沙咀某間現已結業嘅酒家一齊食飯，質疑佢已經「被收購了」，就係因為咁，佢可以喺同年九月「平安」當選立法會議員。
我哋問過長毛，佢話七年前嘅嘢邊記得咁清楚，但講到爆料人提及嗰間酒家，佢就有啲印象，話的確喺嗰度同啲內地幹部食飯，不過唔係中央官員咁誇張，而係廣東增城嘅地方官員。
長毛解釋，○三年佢喺增城居住嘅媽媽過身，一直冇回鄉證嘅佢，其後喺港府協助下獲准一次過返內地奔喪，當時都有幫過手嘅增城官員後來落嚟香港，搵佢食飯敍舊，佢見大家總算有過一面之緣，亦冇拒絕到對方，但席間絕對冇談及任何有關選舉嘅問題，就算傾都唔會同啲地方官講喇！質疑爆料人有心抹黑佢。