政情：蔡素玉偕87歲母遊台
近年香港人興起到台灣吃喝玩樂嘅熱潮，連城中名人都唔例外。早前復活節假期，前高官葉澍堃夫婦、機場管理局行政總裁許漢忠夫婦同埋東區區議員蔡素玉等人，應台灣「觀光之父」亞都麗緻飯店前總裁嚴長壽之邀，到台灣花蓮及台東體驗原住民文化及品嘗當地美食，眾人玩到意猶未盡。
體驗原住民深度文化
出晒名孝順嘅蔡素玉，帶住八十七歲高齡嘅媽媽同行。佢話今次行程同一般旅遊好唔同，主要係體驗當地風俗民情及原住民深度文化，佢對台東嘅美麗山川印象深刻，對當地食物更加讚不絕口，佢哋品嘗咗風味獨特嘅梅子燒雞、旗魚，仲有台東特產池上米，佢仲特登買咗幾斤池上米做手信添！
今次由嚴長壽親自帶隊，大家梗係玩得好盡興。蔡素玉話，當地保持唔少原始風貌，有時要攀山越嶺，但係媽媽都應付自如，認真老當益壯。嚟緊佢又計劃帶媽媽去黑海玩。有冇打算參選？佢耍手擰頭話，乜嘢都唔選，一於專心歎世界。