政情：東亞運變旅議會擋箭牌
本港早前先後爆出旅遊醜聞，迫使港府急謀對策，兼全面檢討旅遊業規管架構。眾所周知，旅遊業界議員謝偉俊（Paul）同業界監管機構旅遊業議會關係有如水溝油，阿Paul周時都話要推冧旅議會，再由港府另立旅遊局取而代之。喺尋日嘅立法會經濟發展事務委員會上，阿Paul又再重提此調，不過多名撐旅議會嘅成員所持理據亦都不弱，佢哋聲言唔係每樣嘢都由港府做先係好，單睇東亞運嚴重超支就可見一斑喎。咁講法，擺明搬民政事務局局長曾德成出嚟為自己擋箭喇！
謝偉俊狠批「三無」機構
尋日立法會繼續討論旅遊業規管架構，向來一講起業界事務就相當勇猛嘅阿Paul，即時瞄準目標向旅議會發炮，批評佢哋係「三無」機構，無權、無錢兼無人，唔改革都唔得，否則啲阿珍、阿蓉事件只會陸續有來。佢又話，家陣旅遊業嘅問題涉及多個行業，唔只係旅行社嘅問題，故港府絕對應該成立旅遊局，跨部門處理問題，而唔應該故步自封喎。
旅議會向來亦非盞省油燈，主席胡兆英聞言即時反駁，強調議會不斷改革，希望他人唔好再以口號式反對，一味話旅議會「自己人管自己人」。另一旅議會理事、香港旅行社協會主席梁耀霖亦幫口話，由邊個負責規管業界都唔緊要，最重要係識得運用資源，而港府喺呢方面就絕對唔係好榜樣，從本港公院連番醫療失誤同雷曼事件就可略知一二喎。同樣撐旅議會嘅國際華商觀光協會有限公司主席馬煜文再踩多港府兩腳，話東亞運嚴重超支搞到咁大鑊，證明即使將規管業界嘅重任交畀港府，都未必係好事。
港府施政連番失誤，負責民政嘅德成局長更掂乜衰乜，先有東亞運連番甩漏同帳目不清，後有申亞觸礁，更唔好講關愛基金籌款失敗呢啲傷心事嘞。旅議會向來都聲大大，即使外界一直有聲音促港府改革、甚至「殺會」，港府都唔敢輕舉妄動。今次德成局長成功曲線為旅議會擋箭，唔知商務及經濟發展局又會唔會多謝佢呢？