中環出更：沈祖堯劍橋呔媲美圖畫
中文大學校長沈祖堯早前戴咗條色澤鮮艷、圖案媲美幅畫嘅Fox & Chave靚呔，極度吸引。原來條呔係購自劍橋大學Fitzwilliam博物館。日前卓妮喺中大嘅活動見到沈校長，佢啱啱去完牛津同埋劍橋兩間大學考察，此程目的係想參考人哋嘅做法，以便將中大文物博物館搞得更出色。考察期間，佢一眼就被花花靚呔吸引，佢盛讚條呔圖案好靚，媲美一幅畫，價錢又唔貴，大約廿元英鎊，折算港紙唔使三百蚊，所以一口氣買咗兩條。
訪大學博物館取經
講番考察心得，沈校長勁讚兩所大學博物館做得好好，幾乎日日有中小學生去參觀或上堂，仲有工作坊畀小朋友動手做。佢話，中大博物館有好多中國藝術品及古董，收藏好豐富，佢認為培養下一代對中國文化嘅興趣，應該由細路哥開始，所以佢諗住將博物館執拾吓，再請番幾個人講解介紹，就可以畀小朋友去博物館體驗中國文化喇！
